Sherr për xhelozi në Itali, 22-vjeçari shqiptar godet me thikë 35-vjeçarin maroken

Britma, ndjekje dhe thika pranë stacionit të Treviglios. Një konflikt që dyshohet se nisi për xhelozi përfundoi me 35-vjeçarin në spital dhe shqiptarin 22-vjeçar në burg për tentativë vrasjeje

Një konflikt i nisur dyshohet për motive xhelozie ka përfunduar me një 35-vjeçar maroken të plagosur rëndë me thikë dhe një 22-vjeçar shqiptar në burg, nën akuzën e tentativës së vrasjes.

Ngjarja ndodhi mbrëmjen e së enjtes në Treviglio, pranë stacionit hekurudhor, në provincën e Bergamos në Itali.

Sipas rindërtimit të deritanishëm, shqiptari dhe 35-vjeçari zbritën rreth orës 22:00 nga i njëjti tren, ndërsa në stacion marokenin po e prisnin edhe dy miq të tij. Debati kishte nisur që më herët dhe situata u përshkallëzua me shpejtësi. Në qendër të konfliktit dyshohet se ishte e dashura e 35-vjeçarit.

Një dëshmitar, pronar i një lokali pranë stacionit, ka treguar se pa grupin duke u grindur sapo zbritën nga treni. Sipas tij, 22-vjeçari shqiptar bërtiste: “Marokenë, do t’ju vras!”.

Kamerat e sigurisë kanë regjistruar fazën e parë të konfliktit. Sipas hetuesve, në nënkalimin e stacionit 35-vjeçari maroken dyshohet se kërcënoi shqiptarin me një thikë të madhe kuzhine.

Përplasja nuk përfundoi aty.

Në një parking në Viale Vittorio Veneto, pranë xhamisë, 22-vjeçari shqiptar dyshohet se e ndoqi 35-vjeçarin i armatosur me dy thika dhe e goditi në krah dhe në pjesën e poshtme të shpinës.

“I pashë shqiptarin duke e ndjekur tjetrin dhe duke e goditur me thikë në shpinë”, ka treguar një dëshmitar.

35-vjeçari humbi një sasi të madhe gjaku dhe u transportua në spitalin e Treviglios në gjendje të rëndë. Gjendja e tij më pas u stabilizua, por ai vazhdon të jetë i shtruar me prognozë të rezervuar.

22-vjeçari shqiptar, banues në Verona, u arrestua po atë mbrëmje. Karabinierët sekuestruan edhe thikën palosëse që dyshohet se u përdor në sulm.

Gjatë marrjes në pyetje, i riu ka pranuar se e kishte goditur 35-vjeçarin me thikë, por ka pretenduar se kishte reaguar për t’u mbrojtur nga sulmi i tij. Ai ndodhet në burg nën akuzën e tentativës së vrasjes dhe pritet të dalë të hënën përpara gjyqtarit për seancën e vlerësimit të masës së arrestit.