KEPI I GJELBËRT – Të paktën 21 persona kanë humbur jetën dhe disa të tjerë janë plagosur në një aksident tragjik me autobus në ishullin Fogo, në Kepin e Gjelbër.

Aksidenti ndodhi të shtunën në mbrëmje, në rrugën që lidh zonën e Cha das Caldeiras me Campanas de Cima, në veri të bashkisë Sao Filipe. Sipas autoriteteve, autobusi ka dalë nga rruga dhe ka përfunduar rreth 30 metra poshtë, në një shpat të thepisur.

Presidenti i Kepit të Gjelbër, José Maria Neves, fillimisht raportoi për 10 viktima, por më vonë e përditësoi bilancin në 21 të vdekur. Mes viktimave është edhe drejtuesi i autobusit.

Sipas agjencisë lokale të lajmeve Inforpress, pjesa më e madhe e viktimave ishin të rinj, kryesisht nxënës të shkollave të mesme nga Curral Grande dhe Ponta Verde.

Autoritetet arsimore kanë sqaruar se udhëtimi nuk ishte organizuar nga shkollat. Bëhej fjalë për një ekskursion privat, të organizuar çdo vit nga drejtuesi i autobusit për nxënësit që ai transportonte gjatë vitit shkollor.

Pas aksidentit, ekipet e emergjencës janë angazhuar në një operacion të vështirë kërkim-shpëtimi, për shkak të terrenit të thepisur dhe aksesit të vështirë në zonën ku përfundoi autobusi.

Autoritetet kanë paralajmëruar se bilanci i viktimave mund të rritet, ndërsa personat e plagosur po marrin ndihmën e nevojshme mjekësore.

Shkaqet e aksidentit mbeten ende të paqarta. Autoritetet kanë nisur hetimet për të përcaktuar rrethanat që çuan në daljen e autobusit nga rruga.