NEPAL – Një 64-vjeçare është nxjerrë e gjallë nga ekipet e shpëtimit në Nepal, më shumë se 10 ditë pasi një masë e madhe akulli, shkëmbinjsh dhe balte përfshiu një luginë në zonën e Himalajeve.

Chandika Shrestha u gjet më 5 shtator nga pjesëtarë të Forcës së Armatosur të Policisë së Nepalit, të cilët po vijonin operacionet e kërkim-shpëtimit në distriktin Nuuakot.

Gruaja u zbulua në katin e katërt të banesës së saj, e cila ishte pjesërisht e mbuluar nga balta. Shpëtimi i saj është cilësuar si i jashtëzakonshëm, pasi kishte kaluar më shumë se një javë nga fatkeqësia dhe shpresat për gjetjen e të mbijetuarve ishin gjithnjë e më të pakta.

Pas nxjerrjes nga banesa, 64-vjeçarja u transportua me helikopter drejt një spitali në Kathmandu, ku po merr trajtimin mjekësor.

Ndërkohë, ekipet e shpëtimit vijojnë kërkimet në zonat e prekura, duke kontrolluar rrënojat dhe masat e baltës me shpresën për të gjetur persona të tjerë që mund të kenë mbijetuar.

Fatkeqësia ka shkaktuar dëme të mëdha në disa zona të Nepalit. Operacionet e kërkim-shpëtimit po zhvillohen në kushte të vështira për shkak të terrenit të thyer malor dhe vështirësive në aksesin e zonave të prekura.