Vendet europiane po rishikojnë mënyrën se si ruajnë rezervat e tyre të arit, në një kohë kur tensionet gjeopolitike dhe pasiguria ekonomike kanë nxitur bankat qendrore të marrin masa për të rritur sigurinë e rezervave.

Rasti më i fundit është ai i Holandës. Banka qendrore holandeze ka zhvendosur rreth 86 tonë ar nga SHBA dhe Kanadaja drejt Londrës, duke deklaruar se vendimi synon ta bëjë bankën “më të përgatitur për kriza të rënda”. Sipas institucionit, ari tashmë ndodhet në kasafortat e Bankës së Anglisë dhe do të jetë më lehtësisht i aksesueshëm në rast nevoje.

Vendimi vjen në një periudhë të karakterizuar nga luftëra, tensione tregtare dhe pasiguri në rritje në ekonominë globale. Mbajtja e arit në vende më të afërta dhe në qendra të mëdha financiare shihet si një mënyrë për të rritur fleksibilitetin dhe sigurinë e rezervave kombëtare.

Edhe vende të tjera europiane kanë ndërmarrë hapa të ngjashëm. Franca ka njoftuar më herët për zhvendosjen e rezervave të arit nga SHBA, ndërsa Bundesbank e Gjermanisë ka transferuar më shumë se 216 tonë ar nga rezervat e mbajtura jashtë vendit, përfshirë 111 tonë nga Nju Jorku dhe 105 tonë nga Parisi.

Londra mbetet një prej destinacioneve kryesore për ruajtjen e arit. Pozicioni i saj si një nga qendrat më të mëdha të tregtimit të arit në botë e bën atë një pikë strategjike për bankat qendrore që duan të blejnë ose shesin metalin e çmuar në mënyrë të shpejtë në rast krize.

Banka e Anglisë është ndër institucionet më të mëdha në botë për ruajtjen e arit. Në kasafortat e saj në Londër ndodhen rreth 400 mijë shufra ari, me një vlerë që kalon 200 miliardë paund.

Zhvendosja e rezervave nuk është një fenomen i ri. Edhe gjatë periudhave të mëparshme të tensioneve globale, bankat qendrore europiane kanë ndryshuar vendndodhjen e rezervave të arit për t’iu përshtatur situatës ndërkombëtare.

Në sfond qëndron edhe rritja e fortë e çmimit të arit. Metali i çmuar ka shënuar rekorde të njëpasnjëshme vitet e fundit dhe ka kaluar nivelin e 5 mijë dollarëve për ons në janar. Ari konsiderohet tradicionalisht një aset “strehë e sigurt”, veçanërisht në periudha të pasigurisë financiare dhe gjeopolitike.

Megjithëse çmimi është tërhequr nga rekordi i fillimit të vitit, ai vijon të qëndrojë në nivele historikisht të larta. Sipas parashikimeve të cituara nga Goldman, çmimi i arit mund të arrijë në rreth 4,900 dollarë për ons deri në fund të vitit 2026.

Kërkesa e vazhdueshme nga bankat qendrore është një prej faktorëve kryesorë që po mbështet çmimin e arit, ndërsa zhvendosja dhe diversifikimi i rezervave reflekton shqetësimet e institucioneve monetare për një periudhë të zgjatur pasigurie globale.