Situata në Frakull të Fierit është qetësuar pas zjarrit masiv që përfshiu kodrat e zonës dhe disa fshatra përreth. Aktualisht raportohet vetëm një vatër zjarri, ku po ndërhyjnë rreth 30 trupa të Forcave të Armatosura.

Pavarësisht qetësimit të situatës, prania e një masivi të madh me pisha mbetet shqetësuese, pasi favorizon riaktivizimin dhe përhapjen e flakëve.

Zjarri nisi pasditen e së premtes dhe vijoi deri gjatë së shtunës, duke përfshirë një masiv në kodrat e Frakullës dhe pesë fshatra të tjerë. Për shuarjen e flakëve u angazhuan edhe mjete ajrore, përfshirë avionët “Air Tractor”.

Situata e krijuar detyroi autoritetet të kryenin edhe evakuime në zonat e rrezikuara. Me përmirësimin e gjendjes, banorët e evakuuar u rikthyen në banesat e tyre.

Ndërkohë, Policia ka arrestuar një 50-vjeçar në Daullas, i cili dyshohet se kishte ndezur zjarr për të djegur barishte, por flakët i kanë dalë jashtë kontrollit.

Për zjarrin masiv që përfshiu zonën e Frakullës, autori ende nuk është identifikuar, ndërsa vijojnë hetimet për zbardhjen e plotë të shkaqeve të rënies së zjarrit.