Një aksident fatal ka ndërprerë Rally Mille Miglia në Itali. Ngjarja e rëndë ndodhi pasditen e së shtunës, 5 shtator, në Bione, në zonën e Valsabbias, në provincën e Brescias.

Sipas rindërtimit paraprak, një makinë pjesëmarrëse në garë doli nga rruga në një kthesë dhe goditi një spektator që ndodhej pranë itinerarit. Pavarësisht ndërhyrjes së menjëhershme të ekipeve të emergjencës, 63-vjeçari nuk mundi të mbijetonte.

Sipas raportimeve të para të mediave italiane, viktima ishte nga Torino dhe kishte udhëtuar drejt Brescias së bashku me bashkëshorten për të ndjekur garën. Identiteti i tij nuk ishte bërë ende zyrtarisht publik nga autoritetet.

Aksidenti ndodhi gjatë një prej provave speciale të Rally Mille Miglia. Automjeti, pasi doli nga traseja, përfundoi në zonën ku qëndronin spektatorët. Autoritetet kanë nisur hetimet për të përcaktuar me saktësi dinamikën dhe shkaqet e aksidentit.

Pas ngjarjes tragjike, drejtimi i garës vendosi fillimisht pezullimin e aktivitetit dhe më pas ndërprerjen e tij. Programi parashikonte zhvillimin e tetë etapave speciale gjatë pasdites së së shtunës, me përfundimin në Piazzale Arnaldo në Brescia.

Vetëm pak orë para aksidentit fatal ishte regjistruar edhe një tjetër incident, ku një makinë kishte përfunduar në një greminë, por pa pasoja të rënda.

Tragjedia ka ndërprerë edicionin e 49-të të Rally Mille Miglia, ndërsa vijojnë hetimet për zbardhjen e plotë të rrethanave të aksidentit.