Kryeministri Edi Rama ka vizituar pasditen e kësaj të shtune zonën e Himarës, e cila u përfshi nga zjarri gjatë natës së kaluar.

Gjatë vizitës, Rama pa nga afër situatën në terren dhe u takua me banorët e zonës, ndërsa falënderoi efektivët e Emergjencave Civile, Forcave të Armatosura, shërbimeve zjarrfikëse dhe strukturave të tjera që u angazhuan për përballimin e situatës.

Zjarri që përfshiu kodrat e Himarës shkaktoi panik mes banorëve dhe turistëve, ndërsa situata u përkeqësua gjatë orëve të natës. Autoritetet u kërkuan qytetarëve të largoheshin nga banesat në rast se konstatonin rrezik për jetën.

Kryetari i Bashkisë Himarë, Vangjel Tavo, u bëri thirrje banorëve të tregoheshin të kujdesshëm dhe publikoi numrat e kontaktit për rastet emergjente.

Pavarësisht ndërhyrjes së forcave në terren dhe punës së pandërprerë gjatë gjithë natës, flakët shkaktuan dëme të konsiderueshme materiale. Gjashtë banesa raportohet se u shkrumbuan plotësisht.

Fatmirësisht, nga zjarri nuk pati viktima apo persona të lënduar.

Gjatë ditës së sotme, autoritetet kanë deklaruar se banorët e Himarës, por edhe qytetarët e zonave të tjera të prekura nga zjarret, përfshirë Fierin, do të dëmshpërblehen për dëmet e shkaktuara.

Gjatë takimit me banorët, Rama është shprehur me një mesazh optimist për përballimin e situatës: “Çfarë s’na vret, na bën më të fortë.”