Partizani ka marrë fitoren e parë në kampionat, duke mposhtur Vllazninë me rezultatin 3-2 në “Loro Boriçi”, në një sfidë dramatike që u vendos vetëm në minutat shtesë.

Ndeshja dhuroi pesë gola, dy përmbysje të avantazhit dhe një fund spektakolar, me Partizanin që fitoi një penallti në sekondat e fundit. Fillimisht Sidibe dështoi nga pika e bardhë, por penalltia u përsërit dhe Human nuk gaboi në tentativën e dytë.

Partizani e nisi ndeshjen në mënyrën më të mirë të mundshme. Në minutën e 4-t, Fadairo mori topin në mesfushë dhe provoi një goditje të fuqishme nga distanca, duke e dërguar sferën në trekëndëshin e portës së Avramit.

Vllaznia reagoi shpejt dhe nisi të ushtrojë presion mbi portën kundërshtare. Në minutën e 21-të, pas një goditjeje nga këndi, topi u përplas me Vatën dhe përfundoi në rrjetën e Partizanit, duke rikthyer baraspeshën.

Shkodranët patën mundësi të kalonin në avantazh, por Qirko mbajti në lojë të kuqtë. Në minutën e 40-të, portieri i Partizanit reagoi mirë ndaj një goditjeje të fortë të Balajt.

Kur pjesa e parë dukej se do të mbyllej në barazim, Partizani goditi sërish. Në minutën e katërt shtesë, Bintsouka nisi një kundërsulm dhe shërbeu për Aliun, i cili u tregua i saktë përballë Avramit dhe riktheu avantazhin e skuadrës së tij.

Partizani shkoi në pushim me rezultatin 1-2.

Në pjesën e dytë, Vllaznia doli më agresive në kërkim të barazimit dhe e gjeti atë në minutën e 57-të. Qirko gaboi në ndërhyrjen e tij, duke grushtuar keq një top në zonë. Sfera përfundoi te Musta, i cili e pati të lehtë ta dërgonte në portën e boshatisur.

Me rezultatin 2-2, ritmi i takimit u rrit ndjeshëm. Të dyja skuadrat krijuan raste, ndërsa Partizani ishte pranë golit të tretë në minutën e 64-t. Aliu u shfaq përballë Avramit dhe tentoi shtyllën e largët, por portieri i Vllaznisë reagoi në kohë.

Vendasit iu afruan golit të fitores në minutën e 79-të. Tounkara gjuajti drejt portës, por Qirko shpëtoi Partizanin. Pak çaste më vonë, Musta tentoi sërish, por Janjeva ndërhyri në momentin e fundit dhe largoi rrezikun.

Kur gjithçka po shkonte drejt një barazimi, drama shpërtheu në minutën e parë të shtesës.

Partizani fitoi një penallti dhe Sidibe mori përsipër ekzekutimin. Goditja e tij u prit nga Avrami, por aksioni nuk përfundoi aty. Arbitri Lata vendosi që penalltia të përsëritej, pasi Musta kishte hyrë më herët në zonë.

Në tentativën e dytë, Human mori përsipër ekzekutimin dhe nuk gaboi. Futbollisti i Partizanit tregoi qetësi dhe mposhti Avramin, duke i dhënë skuadrës së kuqe fitoren 3-2.

Kështu, Partizani largohet nga Shkodra me tri pikë të rëndësishme pas një ndeshjeje spektakolare, ndërsa Vllaznia pëson një humbje të hidhur, pasi arriti të rikthehej dy herë në lojë, por u ndëshkua në sekondat e fundit.