HIMARË – Pas zjarrit të fuqishëm që përfshiu Himarën një ditë më parë, vijon puna në terren për shuarjen përfundimtare të vatrave, pastrimin e zonave të prekura dhe rikthimin gradual të normalitetit.

Kryetari i Bashkisë Himarë, Vangjel Tavo, ka publikuar pamje nga zonat e prekura, ku evidentohen dëmet e shkaktuara nga flakët. Pamjet tregojnë pasojat e zjarrit dhe ndërhyrjen e strukturave në terren.

Sipas Tavos, pas një nate të vështirë, ndërhyrja nga ajri ka mundësuar eliminimin e disa vatrave ku aksesi nga toka ishte i pamundur. Ndërkohë, forcat zjarrfikëse kanë vijuar punën edhe gjatë orëve të para të mëngjesit për shuarjen e vatrave të mbetura aktive.

Ekipet zjarrfikëse janë angazhuar gjithashtu për shuarjen e trungjeve të ullinjve që vijonin të digjeshin dhe që përbënin rrezik për riaktivizimin e flakëve.

Paralelisht me operacionin e shuarjes, punonjësit e Bashkisë Himarë kanë nisur ndërhyrjet për largimin e mbetjeve dhe pastrimin e hapësirave të dëmtuara, me synim rikthimin gradual të shërbimeve dhe normalitetit në zonat e prekura.

Në vijimësi po kryhet edhe evidentimi i dëmeve materiale, proces që do të shërbejë për përcaktimin më të plotë të pasojave të shkaktuara nga zjarri.

Tavo ka theksuar se pamjet e lëna pas nga zjarri duhet të shërbejnë si një moment reflektimi për pasojat që mund të shkaktohen nga zjarret, pavarësisht nëse ato janë aksidentale apo të qëllimshme.

Autoritetet vijojnë monitorimin e zonës, ndërsa strukturat e emergjencave mbeten në gatishmëri për çdo riaktivizim të mundshëm të vatrave.