HIMARË – Ish-kryebashkiaku i Himarës, Fredi Beleri, ka reaguar pas zjarrit që përfshiu mbrëmjen e kaluar zonën e Himarës, duke shkaktuar dëme të konsiderueshme në prona dhe banesa.

Përmes një postimi në rrjetet sociale, Beleri u shpreh se, pavarësisht përmasave të zjarrit dhe dëmeve materiale, fatmirësisht nuk u regjistruan viktima.

Ai e cilësoi situatën e krijuar nga zjarret si një kërcënim gjithnjë e më të madh në Europë dhe në botë, ndërsa ngriti shqetësimin se Shqipëria nuk ishte e përgatitur sa duhet për përballimin e një situate të tillë.

Beleri kritikoi gjithashtu institucionet shtetërore dhe pushtetin vendor për mënyrën se si, sipas tij, trajtohet çështja e mirëmbajtjes dhe mbrojtjes së pronave private.

“Një shtet që nuk garanton as gjërat më elementare — furnizim të pandërprerë me ujë dhe energji elektrike, parandalim, mjete të mjaftueshme zjarrfikëse dhe mbrojtje nga fatkeqësitë natyrore — nuk mund t’u kërkojë qytetarëve të qëndrojnë pasivë”, shkruan Beleri.

Ai u bëri thirrje banorëve të Himarës që të kujdesen dhe të mbrojnë pronat e tyre, duke kërkuar njëkohësisht njohjen dhe regjistrimin përfundimtar të tyre.

“Ne, himarjotët, duhet të kujdesemi për tokën e të parëve tanë, të pastrojmë dhe të mbrojmë pronat tona, duke kërkuar njëkohësisht njohjen dhe regjistrimin përfundimtar të tyre. Pas kësaj katastrofe, askush nuk ka të drejtë t’i pengojë njerëzit të mbrojnë vendin dhe pronat e tyre”, shprehet ai.

Në reagimin e tij, Beleri shprehu solidaritet me banorët që kanë pësuar dëme, si dhe me personat që u përballën me flakët gjatë operacionit për shuarjen e zjarrit.

“Gjatë natës së kaluar, flakët rrethuan një zonë të tërë të Himarës dhe u përhapën në një pjesë të madhe të anës lindore të qytetit. Prona dhe banesa pësuan dëme të mëdha. Fatmirësisht, nuk pati humbje në jetë njerëzish”, shkruan Beleri.

Ai deklaroi gjithashtu se në ditët në vijim do të ndërmerren nisma për mbështetjen financiare të banorëve të prekur nga zjarri dhe për lehtësimin e pasojave të shkaktuara.

Reagimi i Fredi Belerit:

Gjatë natës së kaluar, flakët rrethuan një zonë të tërë të Himarës dhe u përhapën në një pjesë të madhe të anës lindore të qytetit. Prona dhe banesa pësuan dëme të mëdha. Fatmirësisht, nuk pati humbje në jetë njerëzish. Zjarret në Evropë dhe, në përgjithësi, në mbarë botën përbëjnë tashmë një kërcënim të vazhdueshëm. Ishte vetëm çështje kohe që diçka e tillë të ndodhte edhe tek ne. Ndërsa duhej të kishim marrë masat e nevojshme dhe të ishim të përgatitur, rezultati tregoi se nuk ishim.

Megjithatë, në vendin tonë përballemi edhe me një vështirësi tjetër: shteti dhe pushteti vendor nuk na lejojnë të rrethojmë, të pastrojmë dhe të kujdesemi për pronat tona. Kjo është e papranueshme, 36 vjet pas rënies së regjimit komunist. Një shtet që nuk garanton as gjërat më elementare — furnizim të pandërprerë me ujë dhe energji elektrike, parandalim, mjete të mjaftueshme zjarrfikëse dhe mbrojtje nga fatkeqësitë natyrore — nuk mund t’u kërkojë qytetarëve të qëndrojnë pasivë.

Ne, himarjotët, duhet të kujdesemi për tokën e të parëve tanë, të pastrojmë dhe të mbrojmë pronat tona, duke kërkuar njëkohësisht njohjen dhe regjistrimin përfundimtar të tyre. Pas kësaj katastrofe, askush nuk ka të drejtë t’i pengojë njerëzit të mbrojnë vendin dhe pronat e tyre. Mendimet tona janë me bashkëqytetarët që panë pronat e tyre të shkatërroheshin, por edhe me të gjithë ata që luftuan me flakët dhe arritën të kufizonin dëmet. Në ditët në vijim do të ndërmarrim nisma konkrete për mbështetjen financiare dhe lehtësimin real të banorëve të prekur.