KUKËS – Pavarësisht përfundimit të sezonit veror, bregdeti shqiptar vijon të jetë një nga destinacionet e preferuara për qytetarët e Kosovës.

Temperaturat e larta kanë nxitur udhëtimet drejt Shqipërisë edhe gjatë kësaj fundjave, duke sjellë një fluks të shtuar në pikën e kalimit kufitar të Morinës.

Sipas të dhënave të Drejtorisë për Kufirin dhe Migracionin Kukës, vetëm nga ora 05:00 deri në 09:15 të mëngjesit të sotëm kanë hyrë në territorin shqiptar 15 mijë e 823 shtetas të Kosovës.

Fluksi i lartë i udhëtarëve është shoqëruar edhe me një numër të konsiderueshëm automjetesh. Gjatë së njëjtës periudhë, nëpërmjet pikës kufitare të Morinës kanë hyrë në Shqipëri 4 mijë e 107 mjete të vogla dhe autobusë.

Autoritetet kufitare vijojnë monitorimin e situatës për menaxhimin e fluksit të lëvizjeve në pikën e kalimit kufitar.