DURRËS – Policia e Durrësit ka zbardhur ngjarjen e ndodhur më 28 gusht në lagjen nr. 3 të qytetit, ku u konstatua një sasi lënde plasëse e lidhur me një aparat telefonik celular. Në kuadër të operacionit të koduar “Sinjali”, janë arrestuar dy persona, të dy banues në Durrës.

Në pranga kanë rënë shtetasit S. Ç., 47 vjeç, dhe M. T., 46 vjeç, të dyshuar nga policia si autorë të vendosjes së lëndës plasëse.

Sipas policisë, ngjarja u regjistrua më 28 gusht 2026, në lagjen nr. 3, ku u konstatua një aparat telefonik celular i lidhur me një sasi lënde plasëse.

Në vijim të hetimeve, të kryera nga strukturat e Drejtorisë Vendore të Policisë Durrës në bashkëpunim me Prokurorinë, janë sekuestruar në cilësinë e provës materiale tre aparate telefonikë celularë. Pajisjet pritet t’i nënshtrohen ekzaminimeve të mëtejshme për të përcaktuar rolin e tyre në ngjarje.

Dy të arrestuarit dyshohen për veprat penale “Shkatërrimi i pronës me eksploziv”, e mbetur në tentativë, si dhe “Mbajtja pa leje dhe prodhimi i armëve, armëve shpërthyese dhe municionit”, kryer në bashkëpunim.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës.

Ndërkohë, hetimet vijojnë për dokumentimin e plotë të rrethanave të ngjarjes dhe përcaktimin e motivit.