Një rrjet i trafikimit të lëndëve narkotike nga Shtetet e Bashkuara të Amerikës drejt Shqipërisë është goditur nga Policia e Tiranës, e cila ka vënë në pranga një 20-vjeçar si porositës të lëndës.

Në kuadër të operacionit policor të koduar “Delivery”, Seksioni për Hetimin e Narkotikëve, nën drejtimin e Prokurorisë dhe në bashkëpunim me filialin “Qendra Tranzite” të Postës Shqiptare, bëri të mundur identifikimin dhe arrestimin e shtetasit D. S., 20 vjeç, banues në Bathore.

I riu dyshohet se kishte porositur nga SHBA-ja një pako postare që përmbante lëndë narkotike të llojit cannabis sativa me përqindje të lartë THC. Gjatë kontrollit dhe sekuestrimit në cilësinë e provës materiale, u konstatua se pakoja ishte e ndarë në 8 paketime të veçanta, me një peshë totale prej 4 kilogramë e 641 gramësh.

Autoritetet policore po vijojnë hetimet intensive për të zbardhur plotësisht këtë aktivitet kriminal dhe për të identifikuar e kapur persona të tjerë që mund të jenë të përfshirë në këtë rrjet trafiku. Materialet procedurale i kanë kaluar Prokurorisë së Tiranës për veprime të mëtejshme.