Pas orëve të tëra lufte të pandërprerë me flakët, Himara paraqitet sot e shkatërruar në peizazhin e saj natyror dhe bujqësor. Zjarri masiv që përfshiu zonën ditën e djeshme ka lënë pas dëme të jashtëzakonshme materiale, duke prekur rëndë ekonominë e banorëve lokalë.

Në fotot dhe pamjet e siguruara nga terreni duket qartë pasqyra e shkatërrimit: dhjetëra hektarë tokë janë shkrumbuar plotësisht, ndërsa qindra rrënjë ullinj shekullorë dhe pemëtorë janë bërë hi. Flakët, të favorizuara nga era, vunë në rrezik edhe zonat e banuara, por falë ndërhyrjes në kohë, banorët e zonës u evakuuan me sukses, duke shmangur humbjet në njerëz.

Operacioni i vështirë për shuarjen përfundimtare të flakëve ka vijuar pa ndërprerje gjatë gjithë natës. Mbi 20 mjete zjarrfikëse dhe forca të shumta u angazhuan në terren për të vënë nën kontroll vatrat dhe për të parandaluar riaktivizimin e tyre në zonat e banuara. Autoritetet vijojnë verifikimet në terren për të bërë bilancin e plotë të dëmeve të shkaktuara nga ky front masiv zjarri.