Në vorbullën e një konflikti institucional që ka paralizuar sistemin, Kuvendi i Shqipërisë ka ndërhyrë prerazi për të zgjidhur ngërçin e pagave të magjistratëve. Përmes një shkrese zyrtare të datës 2 shtator 2026, firmosur nga kryetari i Kuvendit Niko Peleshi, u është komunuar Gjykatës Kushtetuese, Këshillit të Lartë të Prokurorisë (KLP) dhe Këshillit të Lartë Gjyqësor (KLGJ) se është depozituar projektligji i ri i iniciuar nga Grupi Parlamentar i Partisë Socialiste. Bëhet fjalë për një draft që formalisht është propozuar nga deputetët Aulona Bylykbashi dhe Admir Kadeli.

Kjo lëvizje e mazhorancës duket se nxjerr “nul” dhe bën de facto dhe de jure të pazbatueshme, dy vendimet e muajit gusht 2026 të marra nga KLP dhe KLGJ. Në këto vendime ishin caktuar referencat e reja të pagave për gjyqtarët dhe prokurorët.

Me këtë lëvizje, Qeveria dhe Kuvendi i bëjnë të qartë institucioneve të drejtësisë se ekskluzivitetin e rritjes së pagave të tyre e ka Kuvendi. Ky zhvillim vjen si përgjigje ndaj detyrimit të lënë nga Gjykata Kushtetuese se çështja e pagave duhet të zgjidhej brenda datës 31 korrik 2026.

Por edhe pasi kaloi kjo datë, asgjë nuk ndodhi deri në lëvizjet e fundit.

Sakaq, prej 1 shtatorit 2026, pagat e muajit gusht për gjyqtarët, prokurorët dhe administratën gjyqësore janë bllokuar në Thesarin e Shtetit nga Ministria e Financave.

Përjashtim nga ky bllokim bëjnë SPAK, Gjykata Kushtetuese dhe Shkolla e Magjistraturës, të cilat kanë kaluar pagat me referencat e vjetra.

Sipas projektligjit të Ramës, ndryshimet parashikojnë:

Paga referuese bazë për funksionet gjyqësore dhe të prokurorisë do të llogaritet duke shumëzuar koeficientin 0.38 me pagën e Presidentit të Republikës, e cila do të indeksohet çdo dy vjet.

Për gjyqtarët e Gjykatës së Lartë, vjetërsia llogaritet në masën 2 përqind për çdo vit përvoje, deri në 25 vjet.

Një shtesë për vështirësi pune prej 80 përqind të pagës bruto fillestare për magjistratët e sistemit të posaçëm (GJKKO, SPAK, Apeli Antikorrupsion), Prokurorin e Përgjithshëm dhe Gjykatën e Lartë.

Një shtesë funksioni prej 5 përqind për Prokurorin e Përgjithshëm dhe gjyqtarët e Gjykatës së Lartë.

Ndërkohë që projektligji pritet të kalojë në Komisionin e Ligjeve dhe në seancë plenare gjatë muajve të vjeshtës, Unioni i Gjyqtarëve po përgatit një padi të re për të kundërshtuar këtë ndërhyrje të mazhorancës në Gjykatë.