José Mourinho e ka pranuar se nuk arrin të gjejë një shpjegim për humbjen 1-0 të Real Madridit ndaj Real Betisit, në ndeshjen e së premtes në mbrëmje. Trajneri portugez vlerësoi paraqitjen e skuadrës së tij, por theksoi se dominimi dhe rastet e krijuara nuk mjaftuan për të marrë pikë.

“Ndonjëherë humbet dhe nuk e di pse. Ndonjëherë humbet dhe nuk di si ta shpjegosh. Ne ishim shumë dominues, të përqendruar, kontrollonim absolutisht gjithçka, me shumë lojë sulmuese dhe shumë raste”, deklaroi Mourinho pas ndeshjes.

Betisi kaloi në avantazh në minutën e 81-të me Troy Parrott, ndërsa Real Madridi nuk arriti të konkretizojë mundësitë e shumta. Në fund, drama u shtua me anulimin e një goli të Carlos Espí për pozicion jashtë loje dhe humbjen e penalltisë nga Kylian Mbappé në kohën shtesë.

“Mund të ndryshoj mendje duke parë ndeshjen nesër, por ndjesia ime nga stoli është se nuk e di pse humbëm. Nuk mund ta gjej justifikimin, sepse skuadra luajti shumë mirë në çdo aspekt. Individualisht gjithashtu, nuk kam asgjë për të kritikuar. Ne e meritonim fitoren qartë, por meritimi nuk të jep pikë”, u shpreh trajneri madrilen.

Real Madridi pretendoi gjithashtu se penalltia e Mbappé duhej të përsëritej, pasi Marc Bartra dukej se kishte hyrë në zonë përpara ekzekutimit. Mourinho, megjithatë, tha se nuk i kishte parë pamjet dhe nuk dëshironte të komentonte incidentin pa i analizuar ato.

“Nuk i kam parë. Nuk i kam parë në dhomën e zhveshjes, kështu që nuk mund të komentoj”, tha ai.

Mourinho vlerëson Espí: Ka potencial të madh

Një tjetër episod i diskutuar ishte goli i anuluar i Carlos Espí në minutën e 87-të. Sulmuesi i ri kishte realizuar me një goditje spektakolare dhe dukej se i kishte dhënë Real Madridit barazimin, por ndërhyrja e sistemit VAR konfirmoi pozicionin jashtë loje.

Mourinho e vlerësoi paraqitjen e Espí dhe rëndësinë që ai mund të ketë për skuadrën gjatë sezonit.

“Një djalosh që luan 10 ose 15 minuta dhe shënon një gol të shkëlqyer – mund të jetë pozicion jashtë loje – por ai është një lojtar i rëndësishëm për ne. Ai e bëri punën e tij shumë mirë. Është një djalosh me potencial të madh dhe do të përmirësohet. Nuk mund të jem më i lumtur me të”, deklaroi trajneri.

Mourinho kritikon naivitetin e lojtarëve

Trajneri portugez foli edhe për sjelljen e lojtarëve gjatë ndeshjes, duke e konsideruar skuadrën e tij më pak të zgjuar në menaxhimin e situatave dhe në komunikimin me arbitrin.

“Lojtarët e Betisit janë më të zgjuar se ata të Real Madridit në këtë kuptim. Madridianët janë naivë”, tha Mourinho.

Sipas tij, lojtarët e Betisit u përpoqën vazhdimisht të ndikonin te arbitri, ndërsa futbollistët e Real Madridit nuk reaguan në të njëjtën mënyrë në situatat e diskutueshme.

Humbja ndaj Betisit ishte e para për Real Madridin në këtë sezon dhe e para e Mourinhos që prej rikthimit në La Liga. Madridi e mbylli takimin me tetë gjuajtje në portë, por u largua nga Sevilja pa pikë.

Rezultati i jep Barcelonës mundësinë të shkëputet me tri pikë nga rivali madrilen, nëse katalanasit mposhtin Valencian në transfertë të dielën.