Situata e zjarrit në Himarë po shkon drejt stabilizimit dhe aktualisht nuk paraqitet më rrezik për banesat, sipas informacionit të fundit të përcjellë nga Prefektura e Vlorës.

Forcat e angazhuara në terren vijojnë operacionin për shuarjen e plotë të flakëve dhe izolimin e vatrave të mbetura aktive. Ndërhyrja është përqendruar në kontrollin e zonave të prekura, me qëllim parandalimin e riaktivizimit të zjarrit dhe përhapjes së tij në territore të tjera.

Autoritetet po monitorojnë në mënyrë të vazhdueshme situatën, ndërsa ekipet zjarrfikëse dhe strukturat e emergjencave civile vijojnë të qëndrojnë në gatishmëri në terren.

Pas situatës së rënduar gjatë orëve të mbrëmjes, kur flakët u afruan pranë zonave të banuara dhe u raportua për dëmtimin e disa banesave, përpjekjet e forcave operacionale kanë bërë të mundur frenimin e përhapjes së zjarrit.

Megjithatë, për shkak të pranisë së vatrave aktive, operacioni nuk konsiderohet ende i përfunduar. Ekipet në terren po vijojnë punën për shuarjen përfundimtare të zjarrit dhe garantimin e sigurisë së banorëve dhe turistëve në zonë.