ROMË – Qeveria e Giorgia Melonit ka shënuar një rekord historik në Itali, duke u bërë kabineti më jetëgjatë në historinë e Republikës Italiane. Qeveria ka arritur në 1,413 ditë në pushtet, duke kaluar me një ditë rekordin e vendosur më parë nga qeveria e dytë e Silvio Berlusconit.

Pavarësisht këtij rekordi, një sondazh i YouTrend për Sky TG24 tregon se një pjesë e konsiderueshme e italianëve janë kritikë ndaj drejtimit të vendit. Sipas sondazhit, 53% e të pyeturve besojnë se Italia po shkon në drejtimin e gabuar, ndërsa vetëm 31% mendojnë se vendi po ecën në drejtimin e duhur. 16% janë të pavendosur.

Më kritikët rezultojnë të rinjtë e moshës 18 deri në 34 vjeç, ku 60% vlerësojnë se vendi po shkon në drejtimin e gabuar. Në grupmoshën 50-64 vjeç, kjo përqindje zbret në 44%.

Edhe vlerësimi për punën e qeverisë tregon një tablo të ndarë. 39% e italianëve deklarojnë se performanca e kabinetit Meloni ka qenë më e dobët nga sa prisnin, ndërsa 26% thonë se ka qenë në përputhje me pritshmëritë dhe vetëm 11% e konsiderojnë më të mirë. Ndërkohë, 17% shprehen se nuk kishin pritshmëri të veçanta dhe 7% nuk kanë dhënë përgjigje.

Në matjen e fundit të mbështetjes politike, Fratelli d’Italia mbetet forca kryesore me 26.5%, e ndjekur nga Partia Demokratike me 22.2%. Lëvizja Pesë Yje regjistron rritjen më të ndjeshme, duke arritur në 12.6%.

Sa i përket rekordit të jetëgjatësisë së qeverisë, 59% e italianëve mendojnë se kohëzgjatja e një kabineti nuk është në vetvete tregues pozitiv dhe se rëndësi kanë rezultatet e arritura. Në të kundërt, 30% e konsiderojnë pozitive qëndrueshmërinë e një qeverie për një periudhë kaq të gjatë, ndërsa 11% janë të pavendosur.

Meloni e ka komentuar arritjen përmes rrjeteve sociale, duke shprehur mirënjohje për këtë moment, por edhe përgjegjësi për vijimin e mandatit të qeverisë.