HIMARË – Bashkia e Himarës u ka bërë thirrje urgjente banorëve të zonave të prekura nga zjarri që të largohen menjëherë nga territoret e rrezikuara, ndërsa situata vijon të jetë kritike.

Në një njoftim zyrtar, bashkia u kërkon qytetarëve të zbatojnë udhëzimet e autoriteteve dhe të mos qëndrojnë në zona ku flakët mund të përbëjnë rrezik për jetën dhe banesat.

“Ju lutemi, bindjuni udhëzimeve të autoriteteve dhe largohuni nga zonat e rrezikuara”, thuhet në apelin e Bashkisë Himarë.

Thirrja për evakuim vjen në një moment kur zjarri është përhapur në terren, duke rrezikuar zonat e banuara dhe strukturat përreth. Forcat zjarrfikëse dhe strukturat e emergjencave vijojnë ndërhyrjen për izolimin e flakëve dhe mbrojtjen e banorëve.

Bashkia thekson se siguria e qytetarëve mbetet prioriteti kryesor dhe u kërkon banorëve të ndjekin me përpikëri udhëzimet e ekipeve të emergjencës.