Një 53-vjeçar me origjinë shqiptare është arrestuar nga policia italiane në Napoli, pasi dyshohet se merrej me shpërndarjen e kokainës në zonën e Porta Nolana. Gjatë kontrollit, policia i gjeti 34 doza kokainë dhe 120 euro.

Arrestimi u krye nga efektivët e komisariatit Vicaria-Mercato, gjatë kontrolleve të intensifikuara në territor. Sipas autoriteteve, policia e kishte vënë në vëzhgim 53-vjeçarin pasi e kishte parë duke i dorëzuar një dozë të dyshuar lënde narkotike një personi në zonën e Vico Gabella della Farina.

Sipas raportimeve të mediave italiane, sapo ka konstatuar praninë e policisë, 53-vjeçari ka tentuar të largohet me biçikletë nëpër rrugët e zonës.

Efektivët e kanë ndjekur dhe kanë mundur ta ndalojnë pak më vonë në Via Nolana. Sipas policisë, gjatë ndërhyrjes, i dyshuari ka hedhur biçikletën në drejtim të efektivëve dhe ka kundërshtuar arrestimin, duke i goditur me grushte dhe shqelma.

Sekuestrohen 34 doza kokainë

Gjatë kontrollit personal, policia ka gjetur dhe sekuestruar 34 doza kokainë, me peshë totale rreth 6 gramë, si dhe 120 euro, të ndara në kartëmonedha të prerjeve të ndryshme.

Sipas autoriteteve, 53-vjeçari ishte i njohur më herët për policinë.

Ai akuzohet për posedim të lëndëve narkotike me qëllim shpërndarjen dhe rezistencë ndaj një zyrtari publik.

Pas arrestimit, shqiptari është dërguar në burgun e Poggioreale, ku do të qëndrojë në pritje të seancës gjyqësore për vleftësimin e masës së arrestit.