Protestuesit ishin arrestuar pas protestës pranë Kryeministrisë, nën akuzat për grumbullim të paligjshëm, kundërshtim të punonjësit të Policisë, prishje të qetësisë publike dhe pengim të qarkullimit.

Gjykata e Tiranës ka vendosur të lirojë 14 protestuesit e arrestuar mbrëmjen e 1 shtatorit, pas protestës pranë godinës së Kryeministrisë.

Protestuesit ishin arrestuar nga Policia nën dyshimin për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Prishja e qetësisë publike” dhe “Pengimi i qarkullimit të mjeteve të transportit”.

Gjatë seancës gjyqësore, të arrestuarit kërkuan që arrestimi i tyre të shpallej i paligjshëm dhe të liroheshin pa caktimin e ndonjë mase sigurie. Ata mohuan të kenë kryer vepra penale.

Gjykata ka pranuar kërkesën e tyre, duke vendosur lirimin nga qelia.

Pas vendimit, avokatja Eda Grimci deklaroi se raste të tilla, sipas saj, janë konstatuar edhe më herët nga gjykatat.

“Nuk është hera e parë që Gjykata e Apelit konstaton arrestime të paligjshme. Dy raste prej meje do bëjmë kallëzim penal”, u shpreh Grimci.

Vendimi i gjykatës vjen pas debatit mbi mënyrën e ndërhyrjes së Policisë dhe ligjshmërinë e arrestimeve të kryera gjatë protestës së 1 shtatorit.