Ministria e Infrastrukturës dhe Transportit ka njoftuar se gjatë ditës së sotme, e premte, nuk do të ketë kufizime për qarkullimin e automjeteve të transportit të mallrave me masë totale mbi 20 tonë.

Sipas njoftimit të ministrisë, bazuar në parashikimin zyrtar të temperaturave, për ditën e sotme nuk pritet të plotësohen kushtet e përcaktuara në vendimin për zbatimin e kufizimeve të përkohshme të qarkullimit.

Ministria ka bërë të ditur se do të vijojë monitorimin e përditshëm të parashikimeve meteorologjike. Në rast se temperaturat arrijnë nivelin që aktivizon masat kufizuese, qytetarët dhe operatorët ekonomikë do të njoftohen në kohë.

Kufizimet për automjetet e transportit të mallrave me masë totale mbi 20 tonë janë aplikuar gjatë ditëve të verës, kur temperaturat kanë kaluar 32 gradë Celsius. Në këto raste, qarkullimi i mjeteve të rënda në autostrada është ndaluar për një periudhë të caktuar gjatë ditës.

Vendimi synon të kufizojë ndikimin e temperaturave të larta në infrastrukturën rrugore dhe të garantojë sigurinë e qarkullimit.