TIRANË – Kryeministri Edi Rama ka reaguar sërish ndaj pretendimeve se qeveria shqiptare ka ndërhyrë për mbylljen apo kufizimin e rreth 200 llogarive në rrjetet sociale, të lidhura me persona që kanë marrë pjesë në protestat e fundit.

Në një reagim në platformën “X”, Rama i është përgjigjur Partisë Demokratike Evropiane, e cila kishte ngritur pretendimin për mbylljen e qindra llogarive në Shqipëri. Kryeministri i ka cilësuar këto pretendime si të pabaza dhe ka kritikuar mënyrën e paraqitjes së tyre.

“Jo, kjo është një tjetër pikë e ulët. Ajo që e urreva ishte aludimi i juaj i paturpshëm vizual, dhe fakti që refuzoni ta trajtoni këtë tregon saktësisht se çfarë lloj demokratësh jeni. Më vjen keq!”, shkruan Rama.

Debati vjen pas pretendimeve për çaktivizimin e disa profileve në Instagram dhe rrjete të tjera sociale. Në lidhje me këtë çështje ka reaguar edhe eksperti i mediave sociale Blerim Gjeladini, i cili ka deklaruar se një qeveri nuk ka mundësi të ndërhyjë drejtpërdrejt në sistemet e Instagramit për të mbyllur llogari specifike.

Sipas tij, një shtet mund të ndërmarrë masa ndaj një platforme të tërë brenda territorit të vet, por nuk mund të hyjë në sistemin e Instagramit dhe të përcaktojë individualisht se cilat profile duhet të mbyllen.

Gjeladini ka renditur disa arsye që mund të çojnë në çaktivizimin e llogarive, përfshirë shkeljen e rregullave të platformës, aktivitetin e koordinuar joautentik (CIB), përdorimin e profileve false dhe bot-eve, si dhe përdorimin e metodave artificiale për rritjen e ndërveprimeve dhe shikueshmërisë.

Mes shkaqeve të tjera ai përmend edhe shkeljet e të drejtave të autorit, privatësisë dhe politikave të tjera të platformave. Sipas ekspertit, zhvillimi i inteligjencës artificiale po u mundëson platformave të identifikojnë më shpejt aktivitete të tilla.

“Po të kishte një qeveri mundësi të hynte direkt në sistemet e Instagramit dhe të mbyllte llogari me sustë, kjo do të ishte skandal botëror, çështje sigurie globale dhe çështje besimi te platforma”, është shprehur Gjeladini.

Kryeministri Rama ka publikuar edhe reagimin e plotë të ekspertit, së bashku me një fotografi ku shfaqet një postim që përmban një imazh të tij dhe diçiturën “Edi Rama është vetëm patronazhisti më i gjatë”. Rama e ka shoqëruar publikimin me një koment ironik: “Tani le ta bëjnë edhe këtë patronazhist”.