TIRANË – Katërmbëdhjetë protestuesit e arrestuar pas protestës së së martës do të dalin sot para Gjykatës së Tiranës, ku do të njihen me masën e sigurisë që do të vendoset ndaj tyre.

Protestuesit u arrestuan pasi, për rreth dy orë, bllokuan hyrje-daljet e Kryeministrisë, ndërsa brenda godinës ndodhej kryeministri Edi Rama. Gjatë protestës, Dritan Goxhaj dhe Arben Kola u bënë thirrje pjesëmarrësve që të rrethonin godinën e qeverisë.

Tubimi u zhvendos në rrugën “Ismail Qemali”, në pjesën jugore të Kryeministrisë. Sipas Policisë, protestuesit prekën perimetrin e sigurisë së një institucioni të rëndësisë së veçantë dhe penguan qarkullimin e mjeteve, si dhe lëvizjen e personaliteteve të larta shtetërore.

Ndërhyrja e policisë për lirimin e hyrje-daljeve u shoqërua me përplasje. Sipas autoriteteve, disa prej protestuesve u ulën në rrugë dhe kundërshtuan efektivët, duke i goditur dhe shtyrë ata. Përplasje pati edhe në ambientet e Komisariatit nr. 3, ku ishin shoqëruar disa prej protestuesve.

Ndaj 14 të arrestuarve rëndojnë akuzat për “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Prishja e qetësisë publike” dhe “Pengimi i qarkullimit të mjeteve të transportit”.

Lista e protestuesve të ndaluar:

Dritan Goxhaj Junik Matoshi Edison Lika Erlind Almeta Sokol Bushi Lulzim Gjini Valtion Shameti Florian Manarkolli Desiderjo Alimucaj Bora Mitrovica Arvina Lleshi Ylli Brahaj Arben Kola Aumiraldi Dalliu