Punëtorët u gjetën pasi ekipet e shpëtimit dëgjuan zërat e tyre nga thellësia e tunelit. Autoritetet besojnë se mund të ketë ende të mbijetuar

Një operacion dramatik shpëtimi në Nepal ka përfunduar me nxjerrjen të gjallë të dy punëtorëve, të cilët kishin mbetur të bllokuar për nëntë ditë në një tunel të lidhur me një hidrocentral, pas një rrëshqitjeje masive dhe përmbytjeve në zonën e lumit Trishuli.

Dy të mbijetuarit janë identifikuar si Sanjaya Shah, inxhinier përgjegjës, dhe Kabir Marjahan, inxhinier mbikëqyrës në hidrocentralin Upper Trishuli 3A.

Momenti vendimtar i operacionit erdhi pasi ekipet e shpëtimit dëgjuan zëra nga thellësia e tunelit. Shpëtuesit u bënë thirrje: “Mos u frikësoni, ne jemi këtu për t’ju shpëtuar”, ndërsa nga brenda u dëgjua një përgjigje e dobët: “Në rregull”.

Gjendja shëndetësore e dy punëtorëve është e ndryshme. Sipas autoriteteve, Marjahan nuk është në gjendje të lëvizë krahët dhe këmbët, ndërsa plagët e Shah nuk janë serioze. Të dy janë transportuar në një spital në Katmandu për të marrë trajtim mjekësor.

Shpëtimi i tyre ka rritur shpresat se edhe persona të tjerë mund të jenë ende gjallë në tunele. Ekipet e kërkim-shpëtimit vlerësojnë se deri në 900 persona mund të jenë bllokuar në tunele të lidhura me gjashtë projekte hidroelektrike përgjatë lumit Trishuli.

Katastrofa nisi më 26 gusht, kur një masë e madhe akulli, shkëmbinjsh dhe balte goditi luginën, duke shkaktuar përmbytje dhe dëme të konsiderueshme. Qindra persona rezultojnë ende të zhdukur dhe kërkimet vijojnë në zonat e prekura.

Për të rritur mundësitë e mbijetesës së personave të bllokuar, inxhinierët po pompojnë vazhdimisht oksigjen në tunele, ndërsa ekipet e shpëtimit po përdorin pajisjet dhe teknologjitë në dispozicion. Në operacion po kontribuojnë gjithashtu ekipe nga India, Kina, Koreja e Jugut dhe Australia.

Përmbytjet dhe rrëshqitjet kanë shkaktuar dëme të mëdha edhe në sektorin energjetik të Nepalit. Të paktën 11 hidrocentrale janë dëmtuar ose shkatërruar, ndërsa rreth 10% e kapacitetit të përgjithshëm të prodhimit të energjisë elektrike të vendit është prekur.

Autoritetet vlerësojnë se më shumë se 20 mijë banesa duhet të rindërtohen, ndërsa kostoja e rimëkëmbjes mund të kalojë 5 miliardë dollarë.

Ushtria nepaleze ka deklaruar se operacioni i kërkim-shpëtimit do të vijojë për aq kohë sa të ekzistojë shpresë për gjetjen e të mbijetuarve.