Një përplasje e pazakontë me armë mes pjesëtarëve të dy strukturave kryesore të sigurisë së Ukrainës ka tronditur Kievin, duke detyruar presidentin Volodymyr Zelensky të kërkojë një hetim të plotë dhe përgjegjësi për personat e përfshirë.

Ngjarja përfshiu agjentë të Shërbimit të Sigurisë së Ukrainës (SBU) dhe pjesëtarë të inteligjencës ushtarake (GUR), dy prej institucioneve më të fuqishme të sigurisë në vend.

Në fjalimin e tij të mbrëmjes, Zelensky e cilësoi përplasjen si një “incident absolutisht të turpshëm” dhe e bëri të qartë se përdorimi i armëve mes strukturave ukrainase nuk mund të tolerohet.

“Këtu në Ukrainë, të vetmit njerëz ndaj të cilëve dikush duhet të qëllojë janë pushtuesit rusë, në mbrojtje të Ukrainës. Asnjë shkëmbim tjetër zjarri nuk do të trajtohet kurrë nga shteti ynë si diçka që dikush lejohet ta bëjë”, deklaroi presidenti ukrainas.

Zelensky ka kërkuar që incidenti të hetohet nga prokurorët, ndërsa të dyja agjencitë duhet të zhvillojnë edhe hetimet e tyre të brendshme.

“Duhet të ketë përgjegjësi, përfshirë vendime për personelin nga drejtuesit e shërbimeve të inteligjencës dhe sigurisë për personat e përfshirë në atë që ndodhi”, u shpreh ai.

Përplasja ndodhi gjatë natës dhe në orët e para të mëngjesit të së mërkurës, në lagjen Berezniaky të Kievit. Fillimisht, SBU deklaroi se operacioni ishte zhvilluar në bashkëpunim me GUR për të parandaluar një “sulm terrorist” të dyshuar si të organizuar nga Rusia.

Më vonë, versioni i SBU ndryshoi. Shërbimi deklaroi se agjentët e tij ishin përballur me një grup personash që po përpiqeshin t’i pengonin gjatë një kontrolli.

Gjatë ndërhyrjes, pjesëtarë të njësisë elitare “Alpha” të SBU-së hapën zjarr dhe arrestuan tre persona, të cilët sipas shërbimit ukrainas i përkisnin një prej njësive të forcave të mbrojtjes së vendit. SBU raportoi gjithashtu se disa persona mbetën të plagosur gjatë rezistencës.

Pas ngjarjes janë ngritur dyshime se përplasja mund të ketë lidhje me arrestimin e Stepan Kaplunov, zëvendëskomandant i Korpusit Vullnetar Rus, një formacion me nacionalistë rusë që luftojnë në krah të Ukrainës dhe që lidhet me GUR.

Avokati i Kaplunov ka deklaruar se klienti i tij ishte arrestuar nga SBU në fund të gushtit dhe se të mërkurën ishte dërguar në apartamentin e tij për një kontroll. Sipas avokatit, në atë moment pjesëtarë të GUR-it kanë tentuar të pengojnë hyrjen e SBU-së në banesë.

Përplasja vjen në një moment veçanërisht të tensionuar për Ukrainën. Kievi po përballej me ditën e gjashtë radhazi të sulmeve ruse me dronë, të cilat zyrtarët ukrainas i kanë cilësuar si një ndryshim taktike të Moskës dhe një përpjekje për të goditur aktivitetin ekonomik të vendit.

Ngjarja ka rikthyer në vëmendje edhe çështjen e kontrollit mbi strukturat ukrainase të sigurisë, të cilat që prej nisjes së pushtimit të plotë rus në vitin 2022 kanë zgjeruar ndjeshëm fuqinë, kompetencat dhe burimet e tyre.