Policia ka dhënë informacionin e parë zyrtar lidhur me incidentin e raportuar në një resort në Vlorë, ku pronari i tij, Vasil Bedinaj, ka njoftuar se persona të armatosur janë konfliktuar me të dhe i kanë kërkuar 5 milionë euro.

Sipas Policisë, ngjarja është raportuar rreth orës 11:30. Menjëherë pas marrjes së njoftimit, shërbimet policore kanë shkuar në adresën e dhënë dhe kanë ngritur pika kontrolli në zona të ndryshme, me qëllim identifikimin dhe kapjen e personave të përfshirë.

Gjatë kontrolleve, në afërsi të Pusit të Mezinit, efektivët kanë konstatuar një automjet që lëvizte me shpejtësi dhe janë vënë në ndjekje të tij.

Sipas njoftimit zyrtar, drejtuesi i automjetit ka humbur kontrollin dhe është aksidentuar. Brenda automjetit janë gjetur tre persona. Dy prej tyre kanë pësuar dëmtime si pasojë e aksidentit, ndërsa personi i tretë nuk ka pasur probleme shëndetësore.

Gjatë kontrollit të automjetit, Policia ka gjetur edhe një armë zjarri, tip pistoletë.

Për zbardhjen e plotë të ngjarjes është ngritur një grup i posaçëm hetimor, i cili, nën drejtimin e Prokurorisë, po punon për dokumentimin e dinamikës së incidentit dhe identifikimin e të gjithë personave të përfshirë.

Ndërkohë, shërbimet e Drejtorisë Vendore të Policisë Vlorë, në bashkëpunim me struktura të tjera policore, po vijojnë kontrollet dhe veprimet hetimore për identifikimin dhe kapjen e personave të tjerë që dyshohet se kanë marrë pjesë në ngjarje.

Policia ka bërë me dije se, për shkak se veprimet hetimore janë ende në zhvillim, një njoftim më i plotë pritet të publikohet pas përfundimit të veprimeve të para.

Hetimet vijojnë për të përcaktuar rrethanat dhe dinamikën e plotë të incidentit.

Njoftimi i policisë:

Vlorë/Informacion paraprak

Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të.

Menjëherë pas njoftimit, shërbimet e Policisë kanë shkuar në drejtim të adresës së dhënë, si dhe kanë ngritur pika kontrolli.

Shërbimet e Policisë, në afërsi të Pusit të Mezinit, kanë konstatuar një automjet që lëvizte me shpejtësi dhe janë vënë në ndjekje të tij.

Drejtuesi i këtij automjeti ka humbur kontrollin dhe është aksidentuar. Në automjet janë konstatuar 3 shtetas, 2 prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore.

Gjatë kontrollit në automjet, shërbimet e Policisë kanë gjetur 1 armë zjarri, pistoletë.

Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë.

Shërbimet e Policisë së DVP Vlorë, në bashkëpunim me shërbimet e disa DVP-ve të tjera, po kryejnë kontrolle dhe veprime të tjera, me qëllim identifikimin dhe kapjen e shtetasve të tjerë të përfshirë në këtë ngjarje.

Meqenëse veprimet janë dinamike, në përfundim të veprimeve të para hetimore do të ketë një njoftim të plotë për ngjarjen.