Tiranë, 3 shtator 2026 – Kryeministri Edi Rama ka njoftuar se performanca e deputetëve të Partisë Socialiste do të vlerësohet përmes një sistemi të ri me 100 pikë, që sipas tij synon të rrisë përgjegjshmërinë dhe angazhimin e tyre gjatë mandatit.

Gjatë fjalës së tij në mbledhjen e zgjeruar të grupit parlamentar socialist, Rama tha se sistemi nuk do të shërbejë si mekanizëm ndëshkimi, por si një mënyrë për të vendosur më shumë disiplinë në ushtrimin e mandatit.

Sipas tij, vlerësimi do të marrë në konsideratë disa komponentë të aktivitetit të deputetëve, duke përfshirë punën parlamentare, praninë në territor, kontaktin me qytetarët, cilësinë e dëgjimit dhe reagimit ndaj problematikave, si dhe angazhimin në strukturat e Partisë Socialiste.

Rama e lidhi këtë mekanizëm me nevojën për të shmangur humbjen e kontaktit me qytetarët, të cilën e konsideroi një problem serioz për një forcë politike në pushtet.

“Në këtë botë pasqyrash, humbja e kontaktit me njerëzit është një problem fatal”, u shpreh kryeministri.

Ai tha se sistemi me 100 pikë duhet të shërbejë si një “disiplinë e mandatit”, duke lidhur punën e deputetëve në Kuvend me aktivitetin e tyre në territor dhe marrëdhënien me qytetarët.

“Moduli i matjes së performancës së deputetit me 100 pikë të ndara, jo si ritual ndëshkimi apo marrja masash, është disiplina e mandatit të katër”, deklaroi Rama.

Sipas tij, deputetët do të vlerësohen edhe për mënyrën se si përcjellin problematikat e qytetarëve dhe përgjigjen ndaj tyre, si dhe për punën me strukturat lokale të partisë.

Rama e shoqëroi njoftimin me një paralajmërim politik, duke theksuar se disiplina dhe performanca janë të domosdoshme për të garantuar që deputetët të mos humbasin mbështetjen e qytetarëve.

“Është disiplinë e domosdoshme për të mos dalë me shqelma jo nga qeveria, por nga historia në fund të këtij mandati”, tha ai.

Në fund, Rama nënvizoi nevojën që prania e Partisë Socialiste të forcohet edhe në zonat ku ajo ka pasur më pak mbështetje, duke përmendur si shembull Finiqin dhe Konispolin.

Sistemi i vlerësimit me 100 pikë pritet të jetë pjesë e qasjes së re të PS-së për monitorimin e angazhimit të deputetëve dhe forcimin e lidhjes së tyre me qytetarët gjatë mandatit.