Mat, 3 shtator 2026 – Vatra e zjarrit e regjistruar në zonën e Ulzës, në Bashkinë Mat, vijon të përhapet me shpejtësi, e favorizuar nga era dhe terreni i vështirë.

Sipas informacioneve paraprake, flakët po avancojnë në drejtim të luginës së Shkopetit, duke iu afruar zonës së fshatit Madhesh.

Situata paraqitet e vështirë për ekipet në terren, pasi ndërhyrja nga toka po has vështirësi në izolimin e plotë të flakëve. Zjarri ka shkaktuar dëme në banesa dhe stane, ndërsa po verifikohet edhe nëse janë prekur kafshë të zonës.

Në terren janë angazhuar forcat e Bashkisë Mat, së bashku me efektivë të Forcave të Armatosura, të cilët po punojnë për frenimin e përhapjes së zjarrit dhe mbrojtjen e zonave të banuara.

Për shkak të intensitetit të flakëve dhe vështirësisë së ndërhyrjes nga toka, është kërkuar ndërhyrje nga ajri për të ndihmuar në izolimin e vatrës dhe për të parandaluar përhapjen e mëtejshme të zjarrit drejt luginës së Shkopetit.

Forcat në terren vijojnë përpjekjet për të vënë nën kontroll situatën, ndërsa priten të dhëna të reja mbi përmasat e dëmeve dhe ecurinë e operacionit të shuarjes.