Ditë e nxehtë dhe me temperatura të larta pritet të jetë kjo e enjte në Shqipëri, por moti nuk do të jetë plotësisht i qëndrueshëm në të gjithë territorin.

Sipas të dhënave të Institutit të Gjeoshkencave, gjatë ditës parashikohen reshje të dobëta në qarqet Dibër, Elbasan, Fier, Berat, Korçë, Vlorë dhe Gjirokastër. Reshjet pritet të jenë të izoluara dhe nuk parashikohet një përkeqësim i ndjeshëm i kushteve atmosferike.

Ndërkohë, pjesa tjetër e vendit do të mbizotërohet nga mot i thatë dhe temperatura të larta.

Në zonat bregdetare, termometri pritet të shënojë nga 23°C deri në 37°C, ndërsa në zonat e ulëta temperaturat do të luhaten nga 20°C në 36°C. Në zonat malore, vlerat termike do të jenë më të ulëta, nga 16°C deri në 31°C.

Era do të jetë kryesisht e lehtë dhe me intensitet mesatar. Megjithatë, në bregdet dhe në zonat malore priten momente kur ajo mund të forcohet.

Në përgjithësi, moti do të vijojë të karakterizohet nga temperaturat e larta, ndërsa reshjet e dobëta në disa qarqe do të jenë zhvillimi kryesor atmosferik gjatë ditës.