Një 33-vjeçar me origjinë nga Kosova, emri i të cilit ende nuk bëhet i ditur, është plagosur rëndë me armë zjarri në Mynih të Gjermanisë, pas një konflikti me dy persona ende të paidentifikuar.

Sipas raportimit, pas të shtënave autorët janë larguar nga vendngjarja, ndërsa i plagosuri, pavarësisht gjendjes së rënduar dhe humbjes së gjakut, ka mundur të vrapojë drejt qendrës së qytetit. Pranë një stacioni metroje ai ka telefonuar urgjencën e policisë.

33-vjeçari është transportuar në spital dhe nuk ndodhet në rrezik për jetën. Edhe qytetarë të tjerë kanë njoftuar policinë pasi kanë dëgjuar të shtënat.

Policia gjermane po e trajton ngjarjen si tentativë vrasjeje dhe po kërkon dëshmitarë që mund të ndihmojnë në identifikimin dhe lokalizimin e dy autorëve të dyshuar.