Presidenti i Shteteve të Bashkuara, Donald Trump, ka hedhur një ide të pazakontë për ndryshimin e emrit të Ngushticës së Hormuzit, duke sugjeruar që një prej korridoreve detare më strategjike në botë të quhet “Ngushtica e Trumpit”.

Sipas raportimeve të mediave të huaja, Trump e ka bërë propozimin përmes një postimi në rrjetin e tij social, ku ka ngritur pyetjen nëse ngushtica duhet të riemërtohet, në kushtet kur, sipas tij, Shtetet e Bashkuara kanë marrë kontrollin e zonës.

Presidenti amerikan e ka shoqëruar sugjerimin me një koment ironik, duke deklaruar se nëse ngushtica do të mbante emrin e tij, “do të jetë më nxehtë në atë drejtim”.

Ngushtica e Hormuzit është një nga rrugët detare më të rëndësishme në botë për transportin e naftës dhe gazit. Ajo shtrihet mes Iranit dhe Omanit dhe ka një rëndësi të veçantë për tregjet globale të energjisë dhe transportin ndërkombëtar.

Deklarata e Trump vjen në një periudhë tensionesh të larta në rajon, ndërsa siguria dhe kontrolli i kësaj rruge detare kanë marrë një rëndësi të shtuar për furnizimin global me energji.

Deri tani, nuk është e qartë nëse propozimi i Trumpit është thjesht një koment ironik apo nëse presidenti amerikan e konsideron seriozisht një nismë të tillë.