Komisioni i Disiplinës dhe Etikës së Federatës Shqiptare të Futbollit ka publikuar vendimet pas incidenteve të regjistruara në javën e dytë të Abissnet Superiores, duke dhënë një sërë dënimesh ndaj klubeve dhe zyrtarëve të ekipeve.

Goditjen më të fortë e ka marrë Vllaznia, me zyrtarin e klubit, Alban Xhaferi, që është dënuar me 15 ndeshje pezullim për sulm ndaj zyrtarëve të ndeshjes.

Në zbatim të vendimit, Xhaferit i ndalohet gjithashtu hyrja në të gjitha stadiumet gjatë zhvillimit të veprimtarive sportive të organizuara nga FSHF, deri në përfundimin e dënimit.

Edhe trajneri i Vllaznisë, Edi Martini, është dënuar me 6 ndeshje pezullim për shkelje të rregullave themelore të sjelljes së mirë dhe sjellje josportive ndaj zyrtarëve të ndeshjes.

Ndërkohë, ndihmësi i tij, Elis Dervishaj, është pezulluar për 4 ndeshje, për sjellje josportive ndaj zyrtarëve të takimit.

Një tjetër emër i njohur i futbollit shqiptar që është dënuar nga Komisioni i Disiplinës është trajneri i Dinamo City, Ilir Daja. Për protestë ndaj vendimeve të zyrtarëve të ndeshjes, Daja është pezulluar për 2 ndeshje.

Vendimet e Komisionit të Disiplinës dhe Etikës

AF Elbasani – gjobë 100 mijë lekë për mospërmbushje të përgjegjësive lidhur me rendin dhe sigurinë, pas incidenteve të ndodhura pas përfundimit të ndeshjes. Alban Xhaferi, KF Vllaznia – 15 ndeshje pezullim për sulm ndaj zyrtarëve të ndeshjes. I ndalohet hyrja në stadiume gjatë periudhës së dënimit. Edi Martini, KF Vllaznia – 6 ndeshje pezullim për shkelje të rregullave të sjelljes dhe sjellje josportive ndaj zyrtarëve të ndeshjes. Elis Dervishaj, KF Vllaznia – 4 ndeshje pezullim për sjellje josportive ndaj zyrtarëve. Ilir Daja, FC Dinamo City – 2 ndeshje pezullim për protestë ndaj vendimeve të zyrtarëve të ndeshjes. Human Lancaster Rowan, FK Partizani – është pranuar kërkesa për konvertimin e pjesës së mbetur të dënimit, në bazë të nenit 75 të Kodit të Disiplinës dhe Etikës. KF Delvina – është rrëzuar kërkesa për faljen e dënimit për zhvillimin e ndeshjeve pa spektatorë. Brajan Selmani, KF Iliria – është rrëzuar kërkesa e lojtarit si e pabazuar në Kodin e Disiplinës dhe Etikës. Bruno Telushi, KF Oriku – është rrëzuar kërkesa e lojtarit si e pabazuar në Kodin e Disiplinës dhe Etikës. Kundër këtyre vendimeve lejohet ankim brenda 3 ditëve pranë Komisionit të Apelit.

Dënimet vijnë në një moment kur FSHF ka intensifikuar masat disiplinore ndaj episodeve të dhunës, sjelljeve josportive dhe shkeljeve të rregullave në futbollin shqiptar.