Një aksident i rëndë rrugor me pasojë vdekjen e një 17-vjeçari është regjistruar pasditen e kësaj të mërkure në fshatin Golem të Shkodrës.

Sipas të dhënave paraprake të Policisë, rreth orës 14:20, një automjet me drejtues shtetasin A. M., 50 vjeç, është përplasur me një motomjet në të cilin udhëtonin dy persona.

Përplasja ka rezultuar fatale për 17-vjeçarin, i cili ka humbur jetën. Ndërkohë, personi tjetër që udhëtonte në motor, shtetasi E. N., 28 vjeç, ka mbetur i plagosur.

I riu është transportuar në Spitalin Rajonal të Shkodrës, ku ndodhet nën kujdesin e mjekëve dhe po merr ndihmën e nevojshme mjekësore.

Drejtuesi i automjetit, 50-vjeçari A. M., është shoqëruar në ambientet e Policisë, ku do të kryhen veprimet e mëtejshme procedurale lidhur me ngjarjen.

Në vendngjarje ka mbërritur grupi hetimor, i cili po punon për dokumentimin e plotë të aksidentit dhe përcaktimin e shkaqeve dhe rrethanave që çuan në përplasjen tragjike.