BERAT – Një aksident është regjistruar mesditën e sotme në Berat, në zonën e njohur si “Ura e Varur”, ku një çift bashkëshortësh është përplasur nga një furgon teksa ndodhej në trotuar.

Sipas informacioneve paraprake, furgoni i zi tip “Benz”, që drejtohej nga 60-vjeçari Arben Brahimaj, banues në Vlorë, ka humbur kontrollin dhe ka dalë në trotuar, duke goditur çiftin e të moshuarve.

Në momentin e aksidentit, bashkëshortët po qëndronin në trotuar dhe prisnin hapjen e semaforit për të kaluar rrugën.

Të plagosurit janë transportuar për ndihmë mjekësore në Spitalin Rajonal të Beratit, ku po marrin trajtim. Sipas të dhënave paraprake, ata ndodhen jashtë rrezikut për jetën.

Në dëshminë e tij, drejtuesi i furgonit ka deklaruar se gjatë lëvizjes i janë bllokuar timoni dhe frenat, duke bërë që të humbte kontrollin e mjetit.

Ndërkohë, grupi hetimor ndodhet në vendngjarje dhe po punon për të përcaktuar rrethanat e aksidentit dhe shkakun e humbjes së kontrollit të automjetit.