NJU JORK – Autoritetet e qytetit të Nju Jorkut kanë vendosur të kufizojnë përdorimin e Inteligjencës Artificiale në shkollat publike, duke mos e lejuar përdorimin e saj nga nxënësit deri në klasat e para të arsimit të mesëm.

Sipas një burimi të njohur me çështjen, të cituar nga AFP, përdorimi i mjeteve të Inteligjencës Artificiale do të lejohet vetëm për nxënësit e shkollave të mesme dhe edhe atë në kushte të përcaktuara.

Teknologjia do të mund të përdoret në raste specifike, kryesisht për qëllime edukative që lidhen me njohjen dhe mësimin e vetë teknologjisë, si dhe në kuadër të programeve pilot.

Ndër masat e reja parashikohet edhe ndalimi i chatbot-eve që paraqiten si shoqërues virtualë dhe ofrojnë mbështetje psikologjike për nxënësit, sipas raportimeve të “New York Times”.

Një prej sfidave kryesore për zbatimin e këtyre kufizimeve mbetet kontrolli i përdorimit të Inteligjencës Artificiale jashtë ambienteve shkollore, veçanërisht në kushtet kur nxënësit mund të kenë akses në këto teknologji përmes pajisjeve personale dhe shërbimeve online.

Rregullat e reja nuk e ndalojnë përdorimin e Inteligjencës Artificiale nga mësuesit. Ata do të mund ta përdorin teknologjinë në funksion të punës së tyre, përfshirë përgatitjen e materialeve dhe mësimeve, si dhe hartimin e komunikimeve.

Vendimi vjen në një kohë kur shkollat në mbarë botën po përballen me sfidën e përcaktimit të mënyrës se si Inteligjenca Artificiale duhet të përdoret në procesin mësimor, duke balancuar përfitimet e teknologjisë me rreziqet e mundshme për nxënësit.