MAT – Situata e zjarrit në zonën e Ulzës vijon të jetë kritike, ndërsa flakët janë përhapur në disa fshatra dhe po afrohen rrezikshëm pranë zonave të banuara.

Sipas informacioneve paraprake, vatrat e zjarrit kanë përfshirë fshatrat Madhesh, Lundre dhe Trodhën, duke rrezikuar banesat, banorët dhe sipërfaqet e mbjella.

Për shuarjen e flakëve po ndërhyhet si nga toka, ashtu edhe nga ajri, por deri në këto momente nuk është arritur izolimi i plotë i vatrave. Përhapja e zjarrit dhe terreni e kanë vështirësuar ndërhyrjen e forcave në terren.

Në operacion janë angazhuar shërbimet zjarrfikëse, Forcat e Armatosura dhe strukturat e Mbrojtjes Civile. Paralelisht, po vijon evakuimi i banorëve nga zonat e rrezikuara, ndërsa po bëhet edhe largimi i kafshëve për të shmangur humbjet.

Përballë situatës së rënduar, është kërkuar shtimi i ndërhyrjeve nga ajri, veçanërisht me helikopterë, për të ndihmuar ekipet që po përpiqen të frenojnë përhapjen e flakëve nga toka.

Forcat në terren vijojnë punën për izolimin e vatrave, ndërsa prioritet mbetet mbrojtja e banesave dhe siguria e banorëve të zonës.