TIRANË – Kryeministri Edi Rama do të mbledhë këtë të mërkurë në orën 13:00 ministrat, zëvendësministrat dhe drejtuesit politikë të qarqeve, përfshirë edhe deputetët e deleguar në territore.

Takimi do të zhvillohet në Vilën e Kuqe në Tiranë dhe pritet t’u kushtohet detyrave të përcaktuara nga kreu i qeverisë në mbledhjen e 28 gushtit.

Në atë takim u diskutua organizimi i punës dhe përcaktimi i kalendarit politik për sezonin e ri, ndërsa drejtuesit e strukturave pritet të marrin udhëzime të mëtejshme për hapat që do të ndiqen në terren.

Një prej çështjeve kryesore që pritet të trajtohet është shtrirja në të gjithë territorin e asaj që Partia Socialiste e quan “Prani Besnike”, me synimin për të forcuar kontaktin dhe komunikimin me qytetarët.

Në fokus do të jetë gjithashtu puna për ndryshimet ligjore që lidhen me platformën “PasqyrAlbania”.

Platforma u prezantua gjatë takimeve dyditore të zhvilluara me dyer të mbyllura në Pogradec, ku Rama kërkoi që problematikat e qytetarëve të kthehen në një prej pikave qendrore të punës politike dhe qeverisëse.

Mbledhja e sotme pritet të pasohet nga takime të tjera të strukturave të Partisë Socialiste gjatë ditëve në vijim, në kuadër të organizimit të axhendës politike për periudhën e ardhshme.