Ndryshe nga Gjykata e Posaçme e Shkallës së Parë, e cila prej 1 shtatorit ka nisur zbatimin e rregullores së re për aksesin e medias, Apeli i GJKKO-së nuk ka vendosur të aplikojë të njëjtat kufizime ndaj gazetarëve.

Edhe pse të dyja gjykatat ndodhen në të njëjtën godinë, këtë të mërkurë gazetarët janë lejuar të hyjnë në ambientet e Apelit me telefonat celularë. Pajisjet do të mund të përdoren edhe gjatë zhvillimit të seancave gjyqësore.

Gjyqtarja e Apelit të Posaçëm, Saida Dollani, u ka garantuar gazetarëve se rregullat e transparencës në këtë gjykatë nuk do të ndryshojnë dhe se rregullorja e re e miratuar nga GJKKO-ja e Shkallës së Parë nuk do të zbatohet nga Apeli.

Rregullat e transparencës tek ne nuk ndryshojnë. Nëse ju pengojnë të qëndroni në hollin tonë, më vini në dijeni”, u shpreh Dollani.

Rregullorja e re e Gjykatës së Posaçme të Shkallës së Parë është kundërshtuar nga shoqatat e gazetarëve, të cilat e kanë cilësuar atë si kufizuese ndaj medias. Ndër masat e parashikuara janë kufizime për përdorimin e telefonave dhe pajisjeve regjistruese në sallat e gjyqit, si dhe për praninë e kamerave.

Çështja është ndjekur nga afër edhe nga OSBE, e cila ka bërë të ditur se është në komunikim me Gjykatën e Posaçme dhe po konsultohet edhe me palë të tjera të interesuara.

Vendimi i Apelit për të ruajtur rregullat aktuale të transparencës krijon një diferencë të dukshme në mënyrën e aksesit të medias mes dy niveleve të GJKKO-së.