Ambasadorja e re e Bashkimit Evropian në Tiranë, Sofia Moreira de Sousa, merr sot zyrtarisht detyrën, ndërsa pritet të dorëzojë letrat kredenciale te Presidenti i Republikës, Bajram Begaj, në ceremoninë e parashikuar për t’u zhvilluar në orën 09:30.

Diplomatja portugeze merr drejtimin e Misionit të BE-së në Shqipëri duke zëvendësuar paraardhësin e saj, italianin Silvio Gonzato. Ajo vjen në këtë detyrë pas një karriere të pasur diplomatike brenda institucioneve evropiane, ku së fundmi ka shërbyer si Drejtuese e Përfaqësisë së Komisionit Evropian në Portugali.

Më herët gjatë karrierës së saj, Moreira de Sousa ka mbajtur edhe postin e ambasadores së BE-së në Kepin e Gjelbër, duke sjellë kështu një eksperiencë të gjatë në fushën e diplomacisë ndërkombëtare dhe marrëdhënieve evropiane në prag të procesit të integrimit të vendit.