Një javë pas përmbytjeve shkatërruese që goditën Nepalin, ekipet e shpëtimit kanë arritur të nxjerrin të gjallë 119 persona, mes tyre edhe një shtetas britanik. Ngjarja tragjike, e cila ka lënë pas më shumë se 1,000 viktima, vazhdon të mbajë vendin në gjendje alarmi për shkak të numrit të lartë të të zhdukurve.

Sipas autoriteteve dhe burimeve mediatike, nga 119 personat e shpëtuar, 44 janë gra, 74 janë burra, si dhe është konfirmuar shpëtimi i një shtetasi britanik, identiteti i të cilit mbetet ende i panjohur. Ndërkohë, mbi 3,900 persona vijojnë të rezultojnë të zhdukur, ku rreth 600 punëtorë dyshohet se janë bllokuar në një rrjet tunelesh të mbushura me baltë pranë lumit Trishuli.

Kryeministri i Nepalit, Balendra Shah, ka konfirmuar intensifikimin e operacioneve, ndërkohë që deri të hënën numri i përgjithshëm i të shpëtuarve nga zonat e prekura kishte arritur në 279. Operacionet masive të kërkim-shpëtimit po zhvillohen përmes një koordinimi të ngushtë ndërkombëtar, me përfshirjen e personelit ushtarak nga Nepali dhe Kina, si dhe ekspertëve nga India, Koreja e Jugut dhe Australia.

Fatkeqësia goditi distriktin Rasuwa, në veri të kryeqytetit Katmandu. Sipas Shërbimit Gjeologjik të SHBA-së (USGS), aktiviteti sizmik me magnitudë 5.2 i regjistruar në zonë ishte pasojë e një rrëshqitjeje masive dheu, e cila u shkaktua nga kombinimi i shembjes së akullnajave dhe rrjedhjes masive të mbeturinave.