1 Shtator 2026 – Niveli ekonomik mund të lidhet ngushtë me mënyrën se si ndryshojnë aftësitë fizike dhe funksionale me kalimin e moshës. Në këtë përfundim ka dalë një studim i kryer nga studiues nga Spitalet Universitare të Gjenevës dhe Universiteti i British Columbia-s, i cili analizoi të dhëna shëndetësore për afro 32 mijë persona të moshës 50 deri në 85 vjeç në Britani dhe Kanada.

Sipas analizës, personat me më pak pasuri kishin përgjithësisht nivele më të ulëta të funksionimit fizik dhe përjetonin rënie më të mëdha të lëvizshmërisë dhe aftësisë për të kryer aktivitetet e përditshme ndërsa plakeshin.

Një nga shembujt më të spikatur të studimit lidhet me ritmin e ecjes. Studiuesit raportojnë se një person 60-vjeçar në Angli, që i përket grupit me gjendjen më të dobët ekonomike, mund të ketë një ritëm ecjeje të ngjashëm me atë të një personi 75-vjeçar nga grupi me të ardhura më të larta.

Çfarë matën studiuesit?

Ekipi analizoi disa tregues të funksionimit fizik dhe shëndetit, përfshirë:

ritmin e ecjes; forcën e shtrëngimit të dorës; kapacitetin e mushkërive; dëgjimin; aftësinë për të kryer aktivitete të përditshme, si veshja, larja dhe ushqyerja.

Rezultatet treguan se pabarazitë socioekonomike shoqëroheshin me ndryshime të dukshme në mënyrën se si këto aftësi evoluonin me moshën. Varfëria nuk është i vetmi faktor

Autorët theksojnë se gjetjet janë korrelative. Kjo do të thotë se studimi tregon një lidhje mes statusit socioekonomik dhe gjendjes fizike, por nuk provon se të ardhurat e ulëta janë vetë shkaku i drejtpërdrejtë i plakjes më të shpejtë.

Në analizë u morën parasysh edhe faktorë të tjerë, përfshirë sjelljet shëndetësore, peshën trupore, sëmundjet kronike dhe lidhjet shoqërore. Megjithatë, studiuesit vunë në dukje se të dhënat nuk përfshinin disa faktorë të rëndësishëm, si kushtet gjatë fëmijërisë dhe aksesin në kujdesin shëndetësor privat.

Dallime edhe mes burrave dhe grave

Studimi evidentoi gjithashtu ndryshime sipas gjinisë. Sipas studiuesve, gratë me status më të ulët socioekonomik kishin më shumë vështirësi në lëvizshmëri dhe në kryerjen e aktiviteteve të përditshme, ndërsa në disa tregues të funksionit të mushkërive rezultonin më mirë se burrat në të njëjtën kategori ekonomike.

Gjetjet i shtohen një numri në rritje studimesh që tregojnë se kushtet ekonomike dhe sociale gjatë jetës mund të shoqërohen me mënyrën se si ruhet shëndeti dhe aftësia fizike në moshë të madhe.

Një studim i mëparshëm, i publikuar në vitin 2020, kishte raportuar gjithashtu se shenjat e rënies fizike dhe njohëse mund të shfaqeshin më herët te personat me gjendje më të dobët ekonomike.

Studiuesit theksojnë se kuptimi i këtyre dallimeve është i rëndësishëm për hartimin e politikave që synojnë uljen e pabarazive shëndetësore dhe përmirësimin e cilësisë së jetës gjatë plakjes.