Një infeksion i rrallë i lëkurës, i njohur si dermatofiloza ose “sëmundja e shiut”, po monitorohet me më shumë vëmendje në Evropë pas raportimit të rasteve të reja te njerëzit.

Sipas medias italiane “Tgcom24”, bëhet fjalë për një infeksion të shkaktuar nga bakteri Dermatophilus congolensis, i cili njihet kryesisht në mjekësinë veterinare dhe prek zakonisht kafshët. Te njerëzit, infeksioni konsiderohet i rrallë.

Bakteri lidhet kryesisht me infeksione të lëkurës te bagëtitë, por mund të prekë edhe kuajt, delet dhe kafshë të tjera shtëpiake ose të egra.

Rastet e raportuara së fundmi në Evropë kanë ngritur pikëpyetje mbi mënyrën e transmetimit. Tradicionalisht, infeksioni te njerëzit është lidhur me kontaktin me kafshë të infektuara ose me materiale të kontaminuara.

Megjithatë, të dhënat e reja sugjerojnë se në disa raste mund të ketë transmetim edhe nga personi te personi, veçanërisht përmes kontaktit të drejtpërdrejtë lëkurë më lëkurë. Nuk përjashtohet gjithashtu transmetimi indirekt përmes sipërfaqeve apo objekteve të kontaminuara.

Raste të dyshuara janë evidentuar edhe te persona që merren me sporte me kontakt të ngushtë fizik, si artet marciale. Disa episode janë lidhur gjithashtu me qëndrimin në ambiente të ngrohta dhe me lagështi të lartë, përfshirë saunat.

Infeksioni prek kryesisht lëkurën dhe mund të shkaktojë ndryshime dermatologjike. Megjithatë, për shkak të rasteve të fundit, autoritetet shëndetësore po përpiqen të kuptojnë nëse ka ndryshuar modeli i transmetimit dhe cilët faktorë mund të kenë favorizuar shfaqjen e rasteve te njerëzit.

Qendra Evropiane për Parandalimin dhe Kontrollin e Sëmundjeve (ECDC) po e monitoron situatën, ndërsa ekspertët vlerësojnë se nevojiten të dhëna të mëtejshme për të përcaktuar shkallën reale të përhapjes së infeksionit në Evropë.