Arbitrja shqiptare Emanuela Rusta do të jetë në qendër të një tjetër përballjeje të rëndësishme në futbollin europian. UEFA e ka caktuar atë për të drejtuar ndeshjen e kthimit të raundit të tretë kualifikues të UEFA Women’s Champions League mes Paris Saint-Germain dhe Frankfurt.

Sfida do të luhet më 2 shtator, në orën 18:30, në stadiumin “PSG Campus” në Poissy.

Rusta do të ketë në krah edhe dy arbitre shqiptare. Jena Mala do të jetë njëra prej asistenteve, ndërsa Eglantina Pjetrushaj do të mbajë detyrën e arbitres së katërt. Ekipi i arbitrimit do të plotësohet nga anglezja Nicoleta Bria, në rolin e asistentes tjetër.

Caktimi i Emanuela Rustës në këtë përballje të rëndësishme europiane përbën një tjetër vlerësim për arbitrimin shqiptar dhe konfirmon praninë e tij në nivelet më të larta të futbollit ndërkombëtar.