Ministria e Arsimit ka ndryshuar kriteret për organizimin e klasave dhe përcaktimin e ngarkesës mësimore për punonjësit e arsimit parauniversitar. Ndryshimet janë përcaktuar në udhëzimin nr. 16, datë 27 gusht 2026, që ndërhyn në rregullat e miratuara në vitin 2023.

Një prej ndryshimeve lidhet me numrin e nxënësve që përcakton organizimin dhe drejtimin e shkollave. Në disa prej dispozitave, pragu prej 80 nxënësish është ulur në 60, ndërsa në raste të tjera kufiri prej 81 nxënësish është ndryshuar në 61.

Ndryshime janë bërë edhe në organizimin e klasave. Sipas përcaktimeve të reja, kur numri i nxënësve për një klasë është 21 deri në 30, parashikohen tre klasa, ndërsa është shtuar edhe kategoria për katër klasa kur numri i nxënësve për klasë shkon nga 31 deri në 50.

Udhëzimi përcakton gjithashtu një normë të veçantë për mësuesit e lëndës “Edukim fizik dhe sporte”, e cila do të jetë 21 orë mësimore në javë. Në rregullat e reja përfshihen edhe mësuesit e artit pamor dhe edukimit muzikor.

Ndryshime ka edhe për drejtuesit e shkollave me profil të arsimit fillor. Drejtori ose nëndrejtori nuk do të kufizohet vetëm te orët që përputhen me profilin e diplomës, por mund ta plotësojë normën javore edhe me orë të përcaktuara në pjesë të tjera të udhëzimit.

Rregulla të reja janë përcaktuar edhe për drejtuesit e shkollave artistike. Drejtorët e institucioneve me 61 deri në 200 nxënës do të kenë një ngarkesë prej 6 orësh mësimore në javë, ndërsa për shkollat me 201 deri në 600 nxënës ngarkesa do të jetë 4 orë në javë.

Në degën e Baletit janë specifikuar edhe lëndët që përfshihen në program, ndërsa për specialitetin “Futboll” lënda “Formim Praktik Profesional” do të organizohet në grupet “Lojtarët” dhe “Portierët”. Grupi i portierëve duhet të ketë të paktën 6 nxënës të të njëjtit nivel arsimor.

Udhëzimi prek edhe mësuesit që mbajnë funksione të tjera brenda shkollës. Kryetarit të ekipit lëndor i ulet norma me 2 orë në javë. Për koordinatorin e sigurimit të cilësisë përcaktohet një ngarkesë prej 6 deri në 10 orë, ndërsa koordinatori i këshillimit të karrierës do të ketë 8 deri në 12 orë mësimore në javë.

Ndryshime ka edhe për programin “Pas Shkolle”. Drejtori ose nëndrejtori përgjegjës për organizimin dhe monitorimin e tij do të përfitojë ulje të normës mësimore me 2 orë në javë kur shkolla ka deri në 4 grupe ose klube, dhe me 4 orë kur numri i tyre është mbi 4.

Ndryshimet e reja synojnë të rregullojnë organizimin e institucioneve parauniversitare dhe shpërndarjen e ngarkesës mësimore, duke përshtatur kriteret sipas numrit të nxënësve, profileve arsimore dhe funksioneve që ushtrojnë punonjësit në shkolla.