Japonia po përdor teknologji të avancuara për të përballuar një problem që vitet e fundit është kthyer në shqetësim serioz për komunitetet pranë zonave pyjore: rritjen e rasteve të arinjve që afrohen në vendbanime dhe sulmojnë njerëzit.

Mes mjeteve të përdorura janë kamerat me inteligjencë artificiale, dronët dhe madje robotë në formën e ujqërve, të projektuar për të trembur kafshët dhe për t’i larguar nga zonat e banuara.

Bilanci i sulmeve është përkeqësuar ndjeshëm. Nga prilli 2025 deri në mars 2026, 13 persona kanë humbur jetën dhe më shumë se 220 të tjerë janë plagosur nga sulmet e arinjve. Një vit më parë ishin regjistruar tre viktima dhe 82 persona të plagosur.

Ekspertët e lidhin këtë rritje me ndryshimet demografike në zonat rurale dhe braktisjen e tokave bujqësore, të cilat dikur krijonin një hapësirë ndarëse mes vendbanimeve dhe pyjeve. Ndryshimet klimatike kanë ndikuar gjithashtu në burimet ushqimore të arinjve, duke i shtyrë ata të afrohen më shpesh pranë zonave ku jetojnë njerëzit.

Japonia vlerësohet të ketë më shumë se 57 mijë arinj, ndërsa vetëm gjatë vitit të kaluar janë raportuar rreth 50 mijë raste të shfaqjes së tyre.

Në prefektura si Gunma, Toyama dhe Ishikawa janë instaluar kamera me sensorë lëvizjeje dhe sisteme të inteligjencës artificiale që identifikojnë arinjtë dhe sinjalizojnë autoritetet. Në Hokkaido, dronët mund të ngrihen vetëm pak minuta pas marrjes së një raportimi dhe të gjurmojnë kafshën deri në mbërritjen e ekipeve në terren.

Por zgjidhja më e pazakontë është një robot i njohur si “Ujku gjigant”. Pajisja me energji diellore imiton pamjen dhe ulërimën e një ujku dhe synon të trembë arinjtë duke i bindur të largohen nga zonat bujqësore dhe të banuara. Roboti kushton rreth 4 mijë dollarë dhe prodhuesi ka raportuar rritje të ndjeshme të shitjeve pas shtimit të rasteve të arinjve në zonat urbane.

Megjithatë, teknologjia nuk shihet si një zgjidhje përfundimtare. Kostot dhe vështirësitë për përdorimin e këtyre sistemeve në zona të mëdha i kufizojnë mundësitë e tyre.

Për këtë arsye, disa komunitete kanë rikthyer edhe një metodë më tradicionale: përdorimin e qenve Karelianë, një racë finlandeze e trajnuar për të gjurmuar dhe ndjekur arinjtë larg vendbanimeve pa i vrarë.

Qasja e re e Japonisë synon të kombinojë teknologjinë me metoda jo vdekjeprurëse, në një përpjekje për të ulur përplasjet dhe për të gjetur një mënyrë më të sigurt bashkëjetese mes njerëzve dhe kafshëve të egra.