Dy persona kanë humbur jetën pas goditjes nga rryma elektrike në dy momente të ndryshme, në një ngjarje të rëndë të ndodhur më 29 gusht në Vaun e Dejës.

Qendra Kombëtare e Urgjencës Mjekësore ka reaguar pas ngjarjes, duke sqaruar kronologjinë e ndërhyrjes së ekipeve mjekësore dhe kohën e mbërritjes së ambulancave në vendngjarje.

Rasti i parë u raportua në orën 18:03 si urgjencë për goditje elektrike. Në vendngjarje ndodhej një infermiere e zonës, e cila kishte nisur menjëherë reanimimin kardiopulmonar, por nuk arriti të rikthente qarkullimin spontan.

Në momentin e marrjes së njoftimit, ambulanca e Vaut të Dejës ishte jashtë funksionit për shkak të një defekti teknik. Për këtë arsye, drejt vendngjarjes u nis një ambulancë nga Spitali i Shkodrës, e cila mbërriti në orën 19:44. Përpjekjet për reanimim vijuan edhe gjatë transportit drejt spitalit, por pacienti nuk mundi të mbijetojë.

Situata u rëndua edhe më tej disa minuta më vonë. Një elektricist kishte shkuar në vendngjarje për të ndërhyrë në problemin elektrik, por gjatë punës u godit edhe ai nga rryma.

Për rastin e dytë, kërkesa për ndihmë mjekësore u regjistrua në orën 18:53. Në vlerësimin fillestar, elektricisti rezultonte pa shenja jete. Një ambulancë tjetër nga Shkodra u nis drejt vendngjarjes dhe mbërriti në orën 19:54, ku rasti u konstatua dhe u referua si “Kod i Zi”.

QKUM thekson se goditja elektrike është një urgjencë me rrezik të lartë për jetën dhe, në rastet e rënda, mund të shkaktojë arrest kardiak dhe vdekje të menjëhershme.

Përmes reagimit zyrtar, Qendra Kombëtare e Urgjencës Mjekësore ka shprehur ngushëllimet për familjarët e dy viktimave, ndërsa ka sqaruar se të dy rastet ndodhën në momente të ndryshme dhe se shërbimet e urgjencës u aktivizuan pas marrjes së thirrjeve për ndihmë.