Kryeministri Edi Rama priti në Kryeministri boksierin shqiptar Nelson Hysa, pak ditë pasi ai mbrojti me sukses titullin WBO në ringun e O2 Arena në Londër.

Gjatë takimit, Hysa i dhuroi kryeministrit një palë doreza boksi të zeza, të personalizuara me flamurin kuqezi. Dyshja diskutoi edhe për përgatitjet e boksierit për përballjen e fundit, për të cilën Hysa tha se ishte stërvitur për rreth 11 muaj.

Boksieri shqiptar u përball në Londër me një kundërshtar norvegjez, por arriti të dalë triumfues dhe të ruajë titullin e tij.

Rama ndau në rrjetet sociale edhe momente nga takimi, duke e cilësuar Hysën me nofkën “The Albanian Eagle”, ndërsa në postimin e tij shkroi:

“Nelsoni, ‘The Albanian Eagle’ që nuk njeh humbje dhe unë bashkë me demokratin Zef Gjoni që luftojmë veç për fitore”.

Hysa vijon kështu të mbajë të pamposhtur rekordin e tij në ring, ndërsa suksesi i radhës në arenën ndërkombëtare e ka kthyer sërish në qendër të vëmendjes së sportdashësve shqiptarë.