Ish-çiklisti belg dhe ish-kampioni botëror i garave rrugore, Tom Boonen, ka rrëfyer një përvojë të pazakontë nga vitet e karrierës së tij, duke treguar se ishte përballur në mënyrë të përsëritur me ngacmime seksuale nga fanset.

Në një program televiziv në kanalin flamand VTM, Boonen tha se gjatë periudhës kur ishte në kulmin e famës, disa gra e preknin pa pëlqimin e tij para nisjes së garave.

“Kishte gra që më pickonin të pasmet para fillimit të garave. Në ato momente, ato thjesht të shohin si një copë mishi”, rrëfeu ish-kampioni.

Boonen tregoi se në atë kohë ishte rreth 21 vjeç dhe se sjellje të tilla vinin kryesisht nga gra të moshës 45 deri në 50 vjeç. Sipas tij, në disa raste prekjet shkonin edhe më tej, duke përfshirë zonën e ijëve.

Ish-çiklisti nënvizoi se reagimi ndaj këtyre episodeve nuk ishte gjithmonë serioz, veçanërisht për shkak të moshës dhe statusit të tij si sportist i ri.

“Kur je 25 vjeç dhe thua se kjo të shqetëson, ato thjesht qeshin me ty”, u shpreh Boonen.

Tom Boonen është një nga emrat më të njohur të çiklizmit belg. Gjatë karrierës së tij ai fitoi gjashtë etapa të Tour de France, dy etapa të Vuelta a España dhe katër herë klasikën prestigjioze Paris-Roubaix.