DURRËS- Policia e Durrësit ka zbardhur tetë raste vjedhjesh dy muajit e fundit, duke finalizuar kështu operacionin e koduar “Midsummer”.

Sipas njoftimit të Policisë, dy persona janë identifikuar si të përfshirë në këto çështje. Në prangat e Policisë ka rënë një 49-vjeçar nga Durrësi, pas vjedhjes së një celulari.

I shpallur në kërkim nga Policia, është një 32-vjeçar nga Durrësi si bashkëpunëtor me të arrestuarin. Hetimet po vijojnë për zbardhjen e plotë të rasteve të vjedhjeve që mund të jenë kryer në qytet.

Njoftimi i policisë:

“Durrës/Finalizohet operacioni i koduar “Midsummer”, zbardhen 8 raste të vjedhjes, të kryera gjatë 2 muajve të fundit.

Identifikohen 2 shtetas, të dyshuar si bashkëpunëtorë për këto vjedhje. Arrestohet njëri prej tyre, punohet për kapjen e tjetrit.

Si rezultat i veprimeve intensive hetimore të kryera nga specialistët për Hetimin e Krimeve të Komisariatit të Policisë Durrës, në kuadër të operacionit të koduar “Midsummer”, për zbardhjen e vjedhjeve, u bë e mundur zbardhja e 8 rasteve të vjedhjes, të kryera gjatë muajit korrik dhe gusht 2026, si dhe u identifikuan 2 autorët e dyshuar.

Njëri prej tyre, shtetasi G. Th., 49 vjeç, banues në Durrës, u kap dhe u arrestua në flagrancë pas vjedhjes së një celulari. Ndërkohë, vijon puna për kapjen e bashkëpunëtorit, shtetasit M. B., 32 vjeç, banues në Durrës.

Nga hetimet dyshohet se këta shtetas, në bashkëpunim me njëri-tjetrin, gjatë muajve korrik dhe gusht, kanë kryer 8 vjedhje të ndryshme (në 6 raste raste, vjedhje portofolash, celularësh dhe sendesh personale, ndërsa në 2 raste, vjedhje të matësit të energjisë elektrike).

Vijojnë hetimet për zbardhjen e vjedhjeve të tjera që mund të kenë kryer këta shtetas. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.”